أقر أنا قاريء الموضوع التالي أنني بكامل قوايا العقليه وغير مرغم ولا مجبور ولا ماسكين عليا ذله علشان أعرف مين هو محمد الجوهري ، أقطن في جمهورية مصر العالميه ، تحديدا أنا من بلد الأونطه وطبعا كلنا عارفينها من غير ذكر أسماء ولا ألاء ولا شيماء ، شيء لله ياسيد يابدوي ، ولا أعرفو ولا زرته ولا صليت في المسجد بتاعه مره في حياتي ، يمكن علشان مؤمن بالمقوله إللي بتقول إنه مينفعش إننا نصلي في مسجد فيه ضريح أو قبر مهما كان الشخص المدفون ، باستثناء سيد الخلق أجمعين محمد الأمين علسه أفضل الصلوات وأتم التسليم ، أنا مسلم سني وغير متعصب لأي مذهب ولا فئه معينه ، وعايش بقالي كتير وأبلغ من العمر 25 سنه قابله للزياده في أي سنه ، معشتش فيهم يوم مرتاح أبدا ، يمكن علشان ده حال الدنيا وإن الراحه الأبديه في جنة رب العالمين اللهم أرزقنا بيها يارب العالمين ، ويمكن علشان أنا أصغر إخواتي وحضراتكم عارفين خطورة وحساسية المنصب ده قد إيه ، حاليا كلهم إستجوزو وبقيت وحيد مع إن إسمي في البطاقه زي مهوا وفي الرخصه كمان .
أما عن مدونتي فعمرها بالتقريب كده سنتين ، أنشأتها في السنه الأولى وأغلقتها بعدها بفتره صغيره وفتحت عليها في السنه التالته ونفضت الغبره من عليها وبدأنا الشغل في 13/9/2008
الحقيقه وفي الواقع المغزى من وراء إنشاء مدونتي هو بلدي ، مصر ، مصر ياجدعاااااااااااااااان ، جمهورية مصر العالميه إللي مدوخه الجوهري ومش عارف يرسى على بر معاها ، نفسي تتحرر من الفساد وثقافة الرشوه والواسطه والكوسه بجميع أحجامها وأنواعها وألوانها ، وكل شيء غلط بشوفه في البلد ، من الأخر أنا باموووووووووت في حاجه إسمها إيجابيه وبامووووت من السلبيه والسلبيين ، علشان كده قررت من هنا ورايح مينفعش أقف قدام الأحداث والقضايا في بلدي موقف السلبي الأخرس ، قررت إني أقف للأحداث والقضايا دي بالمرصاد وأستخدم أسلوب الردع المباشر للتصدي ليها ، وأسلحتي في كده هي قلمي وكلمتي الحره الغير تابعه لأي حد والتي لا يؤثر عليها حد والغير خاضعه لحد ويارب يوفقني في المهمه دي .